اردو ادب اور شاعری کا ایک عظیم نام راحت اندوری دار فانی سے کوچ کر گئے

Rahat indori

اردو ادب اور شاعری آج ایک عظیم شاعر اور استاد کی سرپرستی سے محروم ہو گئے۔
بر صغیر کے عظیم شاعر راحت اندوری 1 جنوری ء1950 کو  انڈیا کے شہر اندور میں پیدا ہوئے ۔ان کا اصل نام راحت قریشی تھا۔شاعری میں اندوری تخلص کرتے تھے۔ انہوں نے ابتدائی تعلیم نوتن سکول اندور سے پائی۔ ایم اے اردو کی ڈگری برکت اللہ کالج بھوپال سے حاصل کی اور پی-ایچ-ڈی کی ڈگری بھوج یونیورسٹی مدھیا پردیش  سے مکمل کی۔
راحت اندوری درس وتدریس کے شعبے سے بھی منسلک رہے اور ساتھ ہی مصور ی شاعری اور نغمہ سازی پر بھی ان کو دسترس حاصل تھی۔
گیارہ اگست 2020 کو اردو ادب کا یہ عظیم باب ہمیشہ کے لیے بند ہو گیا۔ ان کی وفات دوران علاج حرکت قلب بند ہو نے سے وہ اس دار فانی سے رخصت ہو گئے۔ سوگواران میں ان کی بیوہ 3 بیٹے اور ایک بیٹی ہیں۔
اللہ تعالی ان کو اپنی جوار رحمت میں جگہ دیں ۔ ان کی وفات سے اردو ادب میں پیدا ہونے والا خلا شاید کبھی پر نہ ہو سکے۔
زیر نظر ان کے شاعری کے کچھ نمونے ہیں ۔

               تیری ہر بات محبت میں گوارا کر کے
               دل کے بازار میں بیٹھے ہیں خسارہ کر کے

               اک چنگاری نظر آئ تھی بستی میں اسے
                  وہ الگ ہٹ گیا آندھی کو اشارہ کر کے

            میں وہ دریا ہوں کہ ہر بوند بھنور ہے جس کی
                    تم نے اچھا ہی کیا مجھ سے کنارہ کر کے

                  منتظر ہوں کہ ستاروں کی ذرا آنکھ لگے
                چاند کو چھت پہ بلا لوں گا اشارہ کر کے

          ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

      چہروں کی دھوپ آنکھوں کی گہرائی لے گیا
                  آئینہ سارے شہر کی بینائی لے گیا

                    ڈوبے ہوئے جہاز پہ کیا تبصرہ کریں
                   یہ حادثہ تو سوچ کی گہرائی لے گیا

                      حالانکہ بے زبان تھا لیکن عجیب تھا
           جو شخص مجھ سے چھین کے گویائی لے گیا

                     میں آج اپنے گھر سے نکلنے نہ پاؤں گا
                   بس اک قمیص تھی جو مرا بھائی لے گیا

                  غالبؔ تمہارے واسطے اب کچھ نہیں رہا
                 گلیوں کے سارے سنگ تو سودائی لے گیا

                ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

       آنکھ میں پانی رکھو ہونٹوں پہ چنگاری رکھو
               زندہ رہنا ہے تو ترکیبیں بہت ساری رکھو

        راہ کے پتھر سے بڑھ کر کچھ نہیں ہیں منزلیں
                   راستے آواز دیتے ہیں سفر جاری رکھو

                 ایک ہی ندی کے ہیں یہ دو کنارے دوستو
                  دوستانہ زندگی سے موت سے یاری رکھو

                  آتے جاتے پل یہ کہتے ہیں ہمارے کان میں
                       کوچ کا اعلان ہونے کو ہے تیاری رکھو

                 یہ ضروری ہے کہ آنکھوں کا بھرم قائم رہے
                  نیند رکھو یا نہ رکھو خواب معیاری رکھو

                    یہ ہوائیں اڑ نہ جائیں لے کے کاغذ کا بدن
                 دوستو مجھ پر کوئی پتھر ذرا بھاری رکھو

                     لے تو آئے شاعری بازار میں راحتؔ میاں
               کیا ضروری ہے کہ لہجے کو بھی بازاری رکھو